Noverint universi quod nos, Jacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; per nos et nostros concedimus et indulgemus vobis venerabili et dilecto nostro fratri Geraldo Amici, castellano Emposte, et per vos ordini Hospitale sancti Johannis Jherosolimitani, quod aliqui christiani vel sarraceni castrorum vel villarum Hospitale que sunt in regno Valencie, non donent nec solvant, nec dare vel solvere teneantur, pedagium, portagium sive lezdam in aliquo loco dominacionis nostre, pro aliquibus rebus quas habuerint de laboracionibus eorum, quas duxerint ad vendendum, vel de precio ipsarum emerunt, nisi forte mercatores fuerint, qui merces suas venales defferant, prout est consuedo et forum Aragonum.

Mandantes baiulis, justiciis et alcaydis, lezdariis et pedagiariis et universis aliis officialibus et subditis nostris presentibus et futuris, quod hoc concessionem et indulgenciam nostram firmam habeant et observent, et contra ipsam non veniant nec aliquem venire permitant aliqua racione.

Datum apud Sanctum Matheum, Vº idus augusti anno Domini Mº CCº Lº sexto.

Signum + Jacobi Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: [1ª col.] Eximinus de Urrea. [2ª col.] Sanccius de Antillone. Blaschus de Alagone. [3ª col.] Ato de Focibus. Michael de Lesu.

Sig+num Jacobi de Monte Judayco, qui mandato domini Regis pro domino fratre Andrea, episcopo Valencie cancellario suo, hec scripsit loco die et anno prefixis.