Noverint universi quod nos Jacobus Dei gratia rex Aragonum, Maioricarum et Valentie, comes Barchinone et Urgelli et dominus Montispesulani; per nos et nostros statuimus concedimus et indulgemus vobis universis populatoribus, et habitatoribus civitatis et tocius insule regni Maioricarum, tam nostris quam richorum hominum episcoporum et prelatorum, et quorumlibet ordinum, et alterius cuiuslibet dominii, et vestris et eorum successoribus imperpetuum, quod pro aliquibus causis criminalibus vel civilibus non trahamini nec teneamini mittere procuratorem vel aliquem extra insulam Maioricarum, nec alias respondere, set respondeatis et fatiatis justicie complementum infra eandem insulam, per vos vel per procuratores vel missos vestros dominis quibus tenebimini respondere.

Concedimus etiam et indulgemus vobis et vestris in perpetuum, quod tenens locum nostrum, vel baiulus, vel vicarius, vel ab eis aliquis substitutus, quamdium fuerit in offitio isto, non emat aliquam possessionem seu rem immobilem per se vel personam interpositam, nec in fraudem istorum aliquid fatiat, nec aliqua accio iuris sive facti sibi fiat; et si factum fuerit iure vel concessione nostra vel nostrorum non obstante non valeat. Nec teneamini a dominis, si quos in Cathalonia vel alibi abuistis redimere vos nec eis aliquid dare, dum honores sive possessiones quas pro ipsis dominis tenuistis, dimitatis eisdem, aliqua consuetudine generali vel speciali contra hoc non obstante.

Concedimus etiam et statuimus, quod forum sive mercatum sit et fiat imperpetuum infra civitatem Maioricarum, singulis diebus sabbati.

Concedimus etiam et indulgemus vobis et vestris imperpetuum, quod non teneamini solvere judeis pro usuris nisi quatuor denarios pro libra denariorum in mense, et pro ut plenius continetur in instrumento sive instrumentis a nobis factis super usuris et contractibus usurariis factis, et faciendis inter christianis et judeos.

Datum Valentie, tertio nonas julii anno Domini millesimo ducentesimo quadragesimo nono.

Signum + Jacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Testes sunt: Eximinus de Focibus, P. de Cillis, G. de Montecathano, G. de Crexello, Carrocius.

Sig+num Petri Andree, qui mandato domini regis, pro G. Scriba notario suo hoc scripsit, loco die et anno prefixis.