Hoc est translatum bene et fideliter translatatum, a quodam instrumento domini regi Aragonum, sello suo cereo maiori sigillato [..... ..... ..... ..... anno Domini millesimo CCº] LXXº primo, tenor cuius talis est:

Noverint universi, quod nos Jacobus Dei gracia rex Aragonum, Maioricharum et Valencie, comes Barchinone et Urgelli et dominus Montispesulani, per nos et [omnes successores nostros] indulgemus vobis, universis et singulis populatoribus et habitatoribus alcheriarum termini Castellionis de Burriana que dicuntur Teccida, Benihayren, Almalaha, Binahut, Binaciet, Benimarhua [et .....], qui tenebamini dare pro unaquaque jovata terre quas habetis vel tenetis in terminis dictarum alcheriarum singulis annis in mense januarii duodecim solidos regalium Valencie, que de cetero vos [et vestri] non teneamini dare nobis vel nostris, vel ecclesie Sancti Vincencii de Valencie, [..... .....] nec alicui priori vel rectori eiusdem ecclesie, seu alicui domino vel seniori predicti castri Castellionis de Burriana, presenti[bus] vel futuris, nec alicui persone viventi, nisi tantum modo decem solidos regalium Valencie singulis annis in mense januarii, pro unaquaque dictarum jovatarum quas tenetis vel tenebitis in terminis dictarum alcheriarum unquam aliquo tempore, aliquo modo, vel aliqua racione, nec teneamini unquam vos vel vestri nobis vel nostris, vel predicte ecclesie Sancti Vincencii, vel alicui priori vel rectori eiusdem ecclesie, seu alicui seniori vel domino predicti castri, seu alicui persone viventi facere exercitum vel cavalcatam, vel dare aliquam redempcionem exercitus vel cavalcate, nec teneamini unquam aliquo tempore dare peytam vel questiam vel cenam, nec aliquam aliam demandam, servicium, vel exaccionem, set a predictis omnibus et singulis sitis vos et vestri franchi et liberi et perpetuo penitus absoluti, sicut ad utilitatem vestram et vestrorum melius dici vel excogitari potest.

Et habeatis vos et vestri dictas jovatas et alcherias franchas et liberas, cum casis et casalibus, affrontacionibus, introitibus et exitibus, aquis et arboribus fructiferis et infructiferis, et melioramentis factis et faciendis, et suis pertinenciis universis a celo in abissum, ad omnes vestras vestrorumque voluntates, cui et quibus volueritis perpetuo faciendas, sine omni laudimio et fatiga, exceptis militibus et sanctis et personis religiosis, vobis tamen et vestris dantibus dictos decem solidos tantum pro unaquaque jovata, ut superius continetur, et salvis nobis et nostris et ecclesie predicte Sancti Vincentii dictis decem solidos in unaquaque jovatarum imperpetuum.

Datum apud Undam, VIIIº kalendas marcii anno Domini millesimo duocentesimo quinquagesimo primo.

Signum + Jacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: [1ª col.] Berengarius de Pug Soriguer, [2ª col.] Guillermus de Angularia, Examinus Petri de Arenoso, [3ª col.] Egidius de Rada, Berengarius de Tornamira.

Sig+num Petri Andree, qui mandato domini regis hec scripsit loco die et anno prefixis.

Sig+num Petri de Castro, [ut presbiteri] qui me pro teste subscribo.

Sig+num Bonanati de Gimerano, notarii publici Castilionis Campi de Burriana, qui hoc translatum fideliter translatavit die et anno prefixis.