Pateat universis quod nos, Iacobus, Dei gratia rex Aragonum, Maioricarum et Valentie, comes Barchinone et Urgelli et dominus Montispesulani; per nos et nostros damus, concedimus et assignamus vobis, universis et singulis habitatoribus de Ontinyen et vestris imperpetuum, ad dividendum inter vos et excolendum, quandam partem sive quendam locum termini de Ontinyen qui vocatur Alforinum, cum alquaria de los Alamos.

Qui locus confrontatur cum terminis de Moxen, de Bugarra, de Villena, de Almizra, de Binaxamen, et de Bocayren.

Ita quod vos et quilibet vestrum habeat vobis et vestris imperpetuum, per hereditatem propriam, francham et liberam, partem vobis et vestris assignatam et terminatam per divissores datos a nobis, cum introitibus, exitibus, afrontationibus et suis pertinentiis omnibus, a celo in abissum, ad tenendum, possidendum, expletandum, dandum, vendendum, alienandum, et ad omnes vestras vestrorumque voluntates cui et quibus volueritis libere perpetuo faciendas, exceptis sanctis, clericis, militibus et personis religiosis.

Concedimus etiam vobis quod possitis aperire murum ville de Ontinyen, in illo scilicet loco iuxta castrum quem vobis duximus assignandum, et possitis etiam ibi facere ianuam sive portam, ut per illam libere ingressus et egressus ac plenius ad predictam villam de Ontinyen perpetuo habeatur.

Data Valencie octavo kalendas febroarii anno Domini Mº CCº quinquagesimo sexto.

Sig+num Iacobi, Dei gratia regis Aragonum, Maioricarum et Valentie, comitis Barchinone et Urgelli et domini Montispesulani.

Testes sunt: Iauzbertus vicecomes de Castronovo, Alvarus Petri de Asagra, Gaucerandus de Pinos, Egidius Garces de Asagra, Iordanus de Peralta.

Sig+num Michaelis de Alcoario, qui mandato domini regis pro domino fratre Andrea, episcopo Valentie cancellario suo, hec scripsit loco die et anno prefixis.