Pateat universis quod nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani; per nos et nostros absolvimus et perpetuo liberamus monasterium Populeti et homines et bona eiusdem ac hominum suorum, ab omni peticione et demanda quam vel quas aliquis seu persona aliqua vellet movere vel facere contra monasterium supradictum vel bonum eiusdem et racione seu pretextu debitorum vel iniuriarum Petri de Queralto qui in eodem monasterio habitum religionis assumpsit.

Ita quod abbas vel monachis aliquis iamdicti monasterii nunquam aliquo tempore teneantur alicui super predictis debitis vel iniuriis respondere, nec aliquis possit iamdictum monasterium, abbatis, monachos seu bona ipsius aliqua, nec homines suos vel bona eorum, racione predictorum debitorum vel iniuriarum impetere vel demandare nec in aliquo convenire, set heredes iamdicti P. de Queralto et bona ipsorum.

Mandantes baiulis, vicariis, curiis, paciariis et universis aliis officialibus et subditis nostris, presentibus et futuris, quod hanc absolucionem et liberacionem nostram observantes firmiter, et facientes inviolabiliter observari prefatum monasterium vel bona eiusdem racione predictorum debitorum vel iniuriarum non gravent vel turbent, nec gravari, offendi, turbari, impediri vel pignorari permittant ab aliquo, imo ipsum et bona sua omnia in hoc ubique manuteneant et defendant tanquam nostra propria contra personam quamlibet, si de nostra confidunt gratia vel amore.

Datum Sorie II kalendas aprilis anno Domini Mº CCº Lº sexto.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: [1ª col.] P. de Montecatano. [2ª col.] P. Cornelii, maiodomus Aragone, Gaucerandus de Pinos. [3ª col.] Sancius de Antilione, P. Martini de Luna.

Sig+num Michaelis de Alcoario, qui mandato domini Regis pro domino fratre Andrea, episcopo Valentino, cancellario suo, hec scripsit loco die et anno prefixis.