Nos Iacobus, et cetera.

Volentes villam nostram de Villa Regali situata in regno Valencie suscipere incrementum; ideo, cum presenti carta nostra, gratis et ex certa sciencia, per nos et nostros concedimus vobis iuratis, probis hominibus et universitati dicte ville de Villa Regali, tam presentibus quam futuris, quod firam et mercatum, quam et quod ex concessione predecessorum nostrorum, et confirmacione nostra habetis et habere debetis in eadem villam, habebitis et teneatis, et haberi et teneri possit franche et libere, per vos et venientes ad dictos mercatum et firam per sex videlicet annos, a die que nos ipsam recuperaverimus a dilecto milite nostro Bernardo de Libiano, qui ea tenet racione venditionis per nos inde sibi facte, in antea continue computandos.

Ita, videlicet quod aliqui mercatores vel aliis in dictam firam et ad dictum mercatum venientes, non teneantur dum ipsam fira et ipsum mercatum durabunt, in introitu vel exitu eorundem, dare nobis vel nostris seu alicui loco nostri pro mercibus vel rebus quas ibi vendent seu ement, pedagium aliquod sive lezdam; immo sint inde franchi et liberi per sex annos superius expressatos.

Transactis vero dictis sex annis, iura nostra in eosdem fira et mercato, nobis et nostros remaneant semper salva.

Nos enim, per presentem mandamus procuratoribus, baiulis, iusticiis, lezdariis, pedagiariis et universis et singulis officialibus nostris presentibus et futuris, quod hanc concessionem et franchitatem nostram firmam habeant et observent ut continetur superius, et faciant inviolabiliter observari, et non contraveniant nec aliquem vel aliquos contravenire faciant, consentiant vel permitant aliqua racione.

Datum Valencie IIIIº kalendas madii anno Domini Mº. CCCº. XIIº.