Noverint universi, quod nos Iacobus Dei gratia rex Aragonum, Maioricarum et Valencie, comes Barchinone et Urgelli et dominus Montispessulani, per nos et nostros concedimus vobis consulibus et toti universitati ville Perpinyani presentibus et futuris, in perpetuum, quod quandocunque baiulus vestri Perpinyani viderit et intellexerit quod ille qui modo habet scribaniam Perpinyani, vel qui in futurum habebit, non possit sufficere ad expediendum instrumenta publica que confecta fuerint in dicta scribania Perpinyani, quod dictus baiulus possit ibi ponere auctoritate nostra alium scriptorem ad conficiendum instrumenta predicta.

Declaramus etiam cum presenti carta nostra, quod crimen enorme esse intelligimus crimen lese magestatis, sodomita, et qui occiderit alium procidiose, et qui populum comovebit sine mandato baiuli, et qui aliquod crimen comiserit propter quod corpus vel aliqua membra corporis debeat amittere.

Concedimus etiam vobis quod si aliquis captus fuerit per baiulum vel curiam Perpinyani, qui non debeat mortem recipere vel perdere aliqua membra, quod curia donet ipsum ad manulevandum tali persone que bene possit persolvere penam, quam per sentenciam solvere tenebitur ille caplevatus, et ille caplevatorum teneatur se obligare ad solvendum dictam penam.

Concedimus etiam vobis, quod consules Perpinyani possint eligere et habere duodecim consiliarios cum consilio baiuli Perpinyani, et dum placuerit vobis.

Mandantes firmiter baiulo Perpinyani presenti et futuris, quatinus predicta omnia et singula firma habeant et observent, et non contraveniant nec aliquem contravenire permittant aliquo modo vel aliqua racione.

Datum Gerunde kalendas marcii anno Domini millesimo CCº LXXº secundo.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt, Guillabertus de Crudiliis, Arnaldus Guillermi de Cartiliano, Ar. de Vilademay, Ar. de Fuxano, Bernardus de Orriols.

Sig+num Michaelis Violeta, qui mandato domini regis hec scribi fecit loco die et anno prefixis.