Noverint universi, quod nos Iacobus Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros cum presenti carta de speciali gracia absolvimus et diffinimus ac remittimus vobis, probis hominibus et universitati ville Perpinyani, ac universis et singulis eiusdem universitatis tam presentibus quam futuris, omnem petitionem et demandam ac penam civiles et criminales quas contra vos vel res vestras habebimus, et habere, imponere, seu infligere poteramus usque in presentem diem quo presens scribitur carta, racione monete malgoriensis per vos recepte contra nostram prohibitionem, ut dictum est, non posimus vel nostri facere vel movere vobis seu vestris peticionem aliquam vel demandam, nec penam aliquam civilem vel criminalem, in personam vesl res vestras imponere seu infligere ullo modo. Vos vero nec vestri de cetero dicta moneta malgoriense non utamini nisi barchinonensi moneta tantum, et si faceretis baiulus noster Perpinyani inde possit inquirere veritatem et contravenientes debite punire.

Nichilominus etiam cum iam statuerimus et modo etiam statuamus quod in Perpinyano et tota terra Rossilionis currat moneta Barchinone et non malgoriense vel alia moneta, et quod emptiones et venditiones, soluciones et alii contractus et carte fiant ad barchinonenses et non ad malgorienses vel ad aliam monetam, volumus tamen et concedimus ac indulgemus vobis universitati predicte, et universis et singulis eiusdem universitatis, quod in quibuslibet solutionibus que fient inter vos vel vobis a quocumque extraneo vel privato racione quorumlibet contractuum, possitis accipere ad cambium monetam malgorientium vel aliaum insolutum denariorum Barchinone vobis seu vestris debitorum, aut qui vobis de cetero debebuntur.

Et non possimus nos vel nostri ex hoc vobis vel vestris petitionem aliquam facere vel movere nec penam pro inde aliquam imponere seu infligere ullo modo.

Et est sciendum quod in predictis omnibus intelligimus iudeos Perpinyani sicuti christianos.

Mandantes firmiter baiulis, curiis, vicariis et universis aliis officialibus et subditis nostris presentibus et futuris, quod predicta firma habeant et observent ac faciant observari et non contraveniant nec aliquem contravenire permittant aliqua ratione.

Datum apud Septem Agues, IIIº nonas augusti anno Domini millesimo ducentesimo septuagesimo tercio.

Sig+num Iacobi, Dei gracia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt, Petrus Ferrandi, Petrus Martini de Luna, Blasco Maça, Bernardus Guillermi de Entensa, Ferricius de Lizana.

Sig+num Symonis de Sancto Felicio, qui mandato domini regis predicti hec scribi fecit et clausit loco die et anno prefixis.