Iacobus Dei gratia rex Aragonum, Maioricarum et Valencie, comes Barchinone et Urgelli et dominus Montispesulani. Fideli suo Petro de Camarata, baiulo Perpinyani. Salutem et gratiam.

Intelleximus quod Raymundus de Caneto uxor condam Raymundi de Caneto, posuit sisam super tritico, ordeo, et alio blado proborum hominum Perpinyani, quod transmittere volunt per mare, et quod onerare faciunt in plagia sua, scilicet super qualibet carta cuiuscumque bladi duodecim denarios.

Unde cum consuetudo sit Perpinyani quod probi homines Perpinyani possint extrahere bladum eorum laborationis de Perpinyano, et transmittere libere ad quascumque partes voluerint, et aliquid racione dicti bladi predicte Raymunde de Caneto, nec alicui alii, dare non consueverint, vobis firmiter dicimus et mandamus quatinus de cetero non detis licenciam predicte Raymunde de Caneto, quod aliquid racione predicta ab eis exigat nec servicium aliquod inde ab eis recipiat.

Mandamus etiam vobis quod predictam consuetudinem eisdem observetis et observari faciatis, scilicet quod permittatis ipsos dictum bladum de Perpinyano extrahere, vel illos qui ipsum ement ab ipsis et deffere ubicumque voluerint.

Et hoc aliquatenus non mutetis.

Datum Ilerde nonas augusti anno Domini millesimo ducentesimo sexagesimo.