Noverint universi quod nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, recipimus et constituimus sub firma proteccione nostra et emparancia, custodia ac guydatico speciali comendatorem et fratres omnes domus Hospitalis Iherosolimitani Cesarauguste, presentes scilicet et futuros, cum villis de Almunia et de Grisenech et cum aliis castris et locis ac hominibus omnibus eorumdem et cum omnibus aliis bonis eorum, tam mobilibus quam inmobilibus ubique habitis et habendis, in eundo, stando et redeundo salve et secure per omnia loca terre et iurisdiccionis nostre, ita scilicet quod nullus de nostri gracia confidens sit ausus eos, comendatorem et fratres dicte domus seu comendatorie eiusdem nec homines, villa, castra vel aliqua loca eorum aut aliqua alia bona sua invadere, capere, detinere, marchare, impedire, offendere vel gravare vel eciam pignorare, culpa, crimine, delicto seu debito alieno nisi debitores vel fideiussores fuerint manifesti nec in hiis eciam casibus, nisi in eis prius fatica inventa fuerit de directo.

Insuper, eciam, volumus et concedimus eidem comendatori, tam presenti quam futuris, quod ipse nec homines villarum et locorum suorum teneantur dare neque donent cenam nec aliquid racione cene alicui persone, nisi nobis tantum vel karissimis filiis nostris, infanti Petro vel infanti Iacobo, cum ad villas seu loca venerint eorumdem.

Mandantes firmiter baiulis, vicariis, curiis, zavalmedinis, merinis, alcaydis et aliis locum nostrum tenentibus et officialibus seu subditis nostris quod hoc presens guidaticum nostrum et omnia alia supradicta firma habeant et observent et faciant inviolabiliter observari et contra non veniant nec aliquem venire permittant aliqua racione; ipsis tamen comendatore et fratribus ac hominibus suis facientibus querelantibus de ipsis iusticie complementum.

Quicumque, autem, contra hoc presens guidaticum nostrum venire presumpserit, iram et indignacionem nostram et penam quingentorum morabatinorum se noverit incursurum, dampno illato eis primitus restituto.

Datum Ilerde, II idus augusti anno Domini M. CC. LX. quarto.