Noverint universi quod nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, attendentes quod pro eo quod curia seu officium curie civitatis oscensis exercetur et fit iuxta ecclesiam sedis civitatis eiusdem, plura pericula et dampna imminent et possent ipsi ecclesie et personis canonicis ac ministris eiusdem diversimode evenire, tam propter effusionem sanguinis, si ibi contingeret perpetrari, tum propter prolationes sentenciarum eorum qui ad mortem condempnantur, tum propter tumultum hominum clamancium et litigancium in curia supradicta, tum propter multa que fiunt et tractantur in curia, que indecencia sunt et inhonesta fieri iuxta ecclesiam et tractari.

Volentes in hoc predicte ecclesie et ministris eiusdem, ut decet salubriter providere, per nos et nostros mandamus firmiter et perpetuo statuimus quod curia et officium curie removeatur penitus a loco ubi modo est seu tenetur, et quod in alium locum civitatis longe ab ecclesia transferatur et mutetur, et nunquam de cetero, aliquo tempore, curia sit iuxta ecclesiam nec officium eiusdem curie ibidem fiat.

Datum Ilerde, tercio kalendas madii anno Domini millesimo CCº septuagesimo quinto.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: Guillelmus Raimundi de Montecathano. Bernardus Guillelmi de Entença. Petrus de Queralto. Guillelmus de Angularia. Raimundus de Cervaria.

Sig+num Simonis de Sancto Felicio, qui, mandato domini regis predicti, hec scribi fecit et clausit loco, die et anno prefixis.