Noverint universi quod cum in civitate Oscensis, carnifices quando volunt vaccas occidere et quandoque quando nubtie fiunt in eadem civitate consueverint fugare et acamçare vaccas easdem per civitatem, et fugando et acamçando eas consueverint ipsas introducere in claustro et etiam in ecclesia oscensis, quod est inhonestum et turpe ac etiam orribile quod bestie introducantur in ecclesia vel claustro aut locis sacris ecclesie sancte Dei; nos Iacobus, Dei gratia rex Aragonum, Maioricarum et Valencie, comes Barchinone et Urgelli et dominus Montispesulani, per nos et nostros mandamus districtius et perpetuo statuimus quod de cetero aliquis vel aliqui non introducant vaccam vel vaccas nec aliquam bestiam in ecclesia oscense, nec in claustro vel aliquo loco ecclesie, nec etiam in platea que est infra ulmum et ecclesiam predictam, si confidunt de nostri gratia vel amore.

Quicumque autem contra hoc mandatum nostrum venire attemptaverit, penam centum morabetinorum se noverit absque remedio incursurum, quotienscumque hoc presumpserint attemptare.

Datum Ilerde, tercio kalendas madii anno Domini millesimo CCº. LXXº. quinto.

Signum + Iacobi, Dei gratia regis Aragonum, Maioricarum et Valencie, comitis Barchinone et Urgelli et domini Montispesulani.

Testes sunt: Bernardus Guillem de Entença. G. R. de Montecathano. P. de Queralto. G. P. de Berga.

Sig+num Simonis de Sancto Felicio, qui, mandato domini regis predicti, hec scribi fecit et clausit loco, die et anno prefixis.